親嚐「薛家宴」力證唔係流 薛家燕任囝囝揀豪宅做愛巢

        早前網上瘋傳一張價值4880元的「薛家宴」酒席廣告,當中有鮑魚、燒雞、乳豬及象拔蚌等相當抵食,不少網民質疑廣告真偽。母親節前夕家燕姐帶埋兩個胞妹及親戚親嚐「薛家宴」,力證酒席唔係流料。大廚仲親自炮製「薛家宴」的乳豬,妹夫食完讚不絕口,大讚隻豬脆卜卜好好味。問到酒樓會唔會為薛家燕再設「新抱宴」呢?未來奶奶家燕姐大笑說:「佢哋都有唔少酒席可供選擇嘅,依家我都為酒席問題而煩緊呀。」

向來鍾意家庭聚會嘅家燕姐當晚約埋五妹家淞、三妹家沅同埋妹夫、一班親戚朋友等齊開餐,見到親戚嘅BB,恨抱孫嘅家燕姐開心到不得了。「薛家宴」代言人家燕姐話,係選取佢最愛嘅菜式,包括當紅炸子雞、卜卜脆乳豬、矜貴鮑魚同埋健康秋葵!

婚宴擺足幾日

  雖然家燕姐明年先娶新抱,但依家經已經好興奮,她自爆日日在計數中,唔想有乜錯漏:「阿仔求婚成功當晚我狂收祝賀訊息,連身在外地嘅朋友都話要返嚟飲喜酒,加埋多年嚟嘅圈中朋友真係有機會擺足兩晚,加上親家住英國,又係元朗圍村人,婚宴要擺足幾次,花費過百萬真係走唔甩,總之囝囝婚禮支出唔設上限,第一次辦喜事唔計得咁多,最緊要開心。」問到係咪豪送2,000萬豪宅畀囝囝做結婚大禮?呢個開心奶奶又笑住爆料:「未呀,有咁多間佢都未揀到邊間,揀到先轉佢名啦!」

採訪:方騫平 場地:皇室一號囍臨門

hd