Advertisement

娛圈老實愛妻男 黃日華拖實老婆去覆診

        因為一套內地版《射鵰英雄傳》,勾起香港人好多回憶,連帶34年前飾演郭靖嘅黃日華都被提起,當年該劇創下99%驚人收視率,咁嗰時又無得上網又無咩娛樂,係睇電視㗎啦。55歲嘅黃日華都話厭倦拍嘢,史上最俏嘅黃蓉翁美玲亦已逝世32年,時間真係好恐怖。

        三年前,黃日華老婆患上急性白血病,當年黃太梁潔華以醫院為家,華仔每日都去探望老婆,經佢悉心照顧,加上黃太嘅努力,最後抗癌成功,之後兩人曾接受訪問,男嘅感謝太太勇敢面對,亦好榮幸成為她的丈夫,女嘅亦讚黃日華是100分老公,嘩,好感人。

  日前下午兩點,100分好老公拖住老婆現身中環,雖然天氣回暖,路人都着晒短袖衫,但黃太身體比較弱,着薄身羽絨最穩陣,兩人先到餐廳食蝦麵,兩公婆各食一大碗,半個鐘後離開,黃日華拖實帶口罩嘅太太上咗一棟大廈,內裏全是醫務中心,逗留個多小時就離開,兩公婆再入Top Shop行街,隨意揭兩揭啲衫,無幫襯就走。


hd