愛妻號 輪流登場 徐榮Ben Sir做「跟得丈夫」

        娛圈有好多愛妻號,好似日前本報就連環影到三pair夫妻,恩愛行超市。先有大台綠葉王徐榮,撇下星級B女包包(徐心怡),拖妻現身銅鑼灣時代廣場買餸。幾乎同一時間,同一地方發現成日笑笑口的陳奐仁推購物車做「跟得丈夫」。另一日,正備戰下月Talk騷的Ben Sir(歐陽偉豪),收起上鏡的鬼馬作風,拖太太Cindy又喺銅鑼灣放閃。

        見到徐榮,好自然諗起佢個超萌B女包包,幾個月大就做BB童星拍長壽劇《愛‧回家》,眨吓眼o依家已經歲半,包包不時拍住父親拍廣告。日前傍晚6時,徐榮與大眼老婆在時代廣場的city'super買餸。徐榮任由愛妻話事,一直跟隨對方揀蔬果、鮮肉等,最重要係負責畀錢和拎嘢。其後,徐太行去food court想食嘢醫肚,老公雖然被唔少途人認出,都keep住微笑與粉絲say hi,最後都係轉場搵食。

  徐榮前腳走,本報又撞見陳奐仁兩夫妻去超市入貨。人夫本來推住架購物車跟實老婆黃頤雅。點知中途,二人咁啱撞到個女性朋友,就企喺度猛吹水。三人吹足十五分鐘,鬼咁高興,最後連嘢都無買,就一齊走人。

  另一邊廂晚上8時許,中文大學中國語言及文學系高級講師、人稱Ben Sir的歐陽偉豪就戴頭箍,低調拖妻現身皇室堡附近的超市。兩公婆撐完枱腳,就拖手入超市買橙、火腿、飲品等。近日忙備戰下月Talk騷的Ben Sir,專登去拎兩包話梅、陳皮等,可能個騷要教大家廣東話文化包括「調九聲」、量詞及語氣助詞等,係時間要keep好把聲啦!

採訪 : 李權威、梁志明


hd