Advertisement

周永恆玩失蹤拒離婚 趙頌茹:都唔知可以點!

        趙頌茹(阿Yu)與周永恆的離婚案拖拉至今仍未解決,據悉雙方要先就兩女撫養權取得共識,惟男方拒出庭聆訊兼玩失蹤,還反咬阿Yu已收取一百萬贍養費,故拒再為兩女付任何責任,面對前夫這種無恥行為,阿Yu也無計可施,唯有努力工作,靠自己養活兩個女。上周六,阿Yu出席開張活動,全程笑容滿面任賓客拉住影相,人肉佈景做足大半粒鐘才功成身退,問到離婚案進展,阿Yu坦言要見步行步,「完全搵佢(周永恆)唔到,又唔肯傾條件,都唔知可以點!」

以「人渣」自居的周永恆有幾賤,相信唔使多講,三年前被揭對阿Yu家暴兼搞婚外情,分居兩年多來,周永恆不時高調拖女出來威,卻從沒養過兩個女,要阿Yu獨力孭起頭家。

周永恆龜縮拒出庭

  據悉離婚案至今仍未解決,全因男方缺席聆訊兼拒絕溝通,「阿Yu都冇話要贍養費,只希望佢可為兩個女的基本生活費盡點責任,但周先生完全唔回應,拖住唔離婚,可能係想用嚟做擋箭牌,唔使被班新女友迫婚。」知情者透露,因雙方未能就孩子撫養權達成共識,故只有原地踏步,等法庭處理。

  面對沉重的經濟壓力,過去大半年乜Job都接的阿Yu,上周六便以代言人身份出席醫美診所開張,見有記者在場,阿Yu煞有介事,但仍笑笑口任影,問到離婚案進展,她無奈地說:「o依家最重要傾掂兩個女撫養權,但佢(周永恆)唔出庭又唔回應,根本聯絡唔到佢,都唔知可以點。」

撰文:彭保迦

hd