《香港華爾街》揼本製作 鎮宇智叔扮香港高官

        由劉德華監製,「福斯傳媒」投資的五集迷你劇《香港華爾街》,昨日在吉隆坡一大學搭景拍攝一場香港立法會開會戲份,吳鎮宇、台灣男星張孝全、廖啟智、內地女星余男及蔡潔等出席。飾演經濟及發展局副局長的鎮宇和財政司的智叔,以一身高官西裝造型現身,鎮宇笑謂:「個頭似民初人。」戴煲呔的智叔就笑言:「我過咗氣啦!」

        男主角鎮宇為了飾演高官,特別留了一頭長髮,他呻:「啲高官個個都唔知點解,好少剪到啲頭髮好短,個頭好似民初人咁。」而演繹上鎮宇特別將聲線放輕兼冇起伏,「見到啲高官喺立法會開會時都係咁嘅,講咩把聲都係好平,就算畀啲議員鬧,都係笑笑口。」而問到戴煲呔嘅智叔係咪扮緊某人?他笑說,「劇組買咗好多煲呔,冇人肯戴啫!」

  演律師的張孝全會跟女主角余男有一段情,鎮宇笑問有冇「動作戲」?孝全面紅紅答:「大家看劇就知我們有否親密鏡頭。」鎮宇搞鬼指本來跟孝全有「動作戲」,但被余男拆散了。

  而孝全有不少扮在緬甸的戲份,不但要講緬甸話,還要戴假髮着裙,「緬甸話好難學,大家成日話我講到似日文。假髮也很不適應,天氣又熱,裙也經常掉下來。」

  劇集在吉隆坡拍外景已接近一星期,執行監製及導演黃國強解釋,因大部份高官都是殖民地培養出來,而吉隆坡保存殖民地色彩比較好,所以選擇在當地取景。對於鎮宇表示劇集製作揼本,為了這場立法會戲全組飛過來,黃國強表示:「我哋製作費都係每集100萬美金,預計會開第二季,但要完成呢季拍攝先正式籌備。」

採訪︰杜淑霞、李維隆


hd