唱老歌 為港添和諧 「龍威武」MK合體開騷

        資深歌手李龍基、威利及張武孝(大AL)將於7月15及16日於旺角麥花臣場館舉行兩場《龍威武三個好歌男人演唱會》。屆時他們除了大唱經典好歌,如李龍基的《男子漢》、大AL的《我的歌》和威利主唱經典劇《獵鷹》主題曲《胸懷大志》等外,仲會為港人發放正能量,威利笑言:「近年香港太嘈吵,我哋搵啲和諧出來,緩和吓心態。」

        過往三人多次合作,包括為《明愛暖萬心》和《澳洲華裔小姐選舉》做表演嘉賓,今次再度有機會合體,全因老闆孫敬安對舊歌有情意結,出錢出力。

  一把年紀的威利話再唔做怕俾fans遺忘;大AL自爆仍然好享受舞台,唔想有遺憾;李龍基表示唱歌可以得到滿足感。到時他們由經典英文金曲唱到粵曲及時代曲,威利連西班牙歌都唔放過。當問到會否好似三個「小生」胡楓、謝賢、Joe Junior咁有拗撬?李龍基即帶笑回應:「哈!都有,我妒忌威利咁靚仔,啲fans去晒佢度,其實去到我哋啲年紀工作為求開心,仲嗌乜鬼交呀!」大AL點頭附和說:「留返啲氣唱歌好過。」威利謂現階段只求身體健康,開心快樂,在台上只會鬥歌,唔係鬥氣,最好呢個夾埋200歲嘅「兩蚊人」(65歲長者)組合,長做長有。

  對於時下樂壇狀況,大AL坦言年輕歌手冇乜特質同個人風格;李龍基較為睇好吳若希(Jinny)、謝安琪(Kay)、周杰倫及容祖兒,對於Kay及Jinny被彈唱歌常有走音,威利卻為兩人平反說:「小小走音只要拿揑得好就能變成風格啦。」

採訪:方騫平

hd