Advertisement

帶私家Cue秘密練波 蘇志威 越級挑戰傅家俊

        近日,香港桌壇一哥傅家俊幫ViuTV主持一個名為《約咗傅家俊》嘅節目,佢會邀請藝人嘉賓打桌球、吹吓水。日前,輪到草蜢嘅蘇志威做嘉賓,面對世界級對手,蘇老闆不容有失,日前專登拎支私家Cue(球桿)落旺角相熟波樓秘密練波。見他篤足8個鐘才走人,好認真備戰喎!

        月初51歲生日的蘇志威,早前應邀錄影《約咗傅家俊》,即場與桌球高手傅家俊對戰,雖然獲讓80度,最終仍以9度之差落敗。蘇志威事後坦言與傅家俊比賽緊張到手震,雙手完全控制不到。講到「篤波」,蘇老闆話讀書時期已經成日「蒲波樓」打通宵,入行後就無時間打,直至近年才重拾波癮,圈中的波友有張智霖及張衛健,大家水準差不多。

  要在鏡頭前對戰世界級人馬,日前蘇志威專登去旺角的相熟波樓秘密練波。當日蘇老闆大約傍晚6時拎支私家Cue到場,適逢波樓當日隆重開幕,波樓一角放滿三文治、炒粉麵、雞翼等到會美食,蘇老闆一到場先和朋友吹陣水,然後醫飽個肚就開波。見他和圈外朋友切磋球技,蘇老闆有姿態有實際。不過間中失手,他即扁嘴擰擰頭,明顯唔滿意自己表現。連打幾局有贏有輸,然後坐低唞唞。休息十分鐘又打過,直至凌晨二時才走人,鬼咁忘我呢!

採訪 ︰ 張詠森

hd