同吳鎮宇拍網劇 崔碧珈努力Keep Fit唔肥得

        回復自由身的崔碧珈(Anita)既要幫Viu TV主持節目又要拍戲,工作好忙,但佢唔會放棄做運動,打波、游水踩單車樣樣皆能的她會配合飲食keep fit,因要開拍網劇《香港華爾街》,加上正值夏天,多機會以性感打扮工作,所以要踢走脂肪。問今年會出寫真嗎?她笑言唔想為影而影,再性感啲又接受唔到,不過擁有私人健身教練牌的Anita表示,如果是出一本講運動的寫真就會考慮。

Anita稱小時媽咪管教嚴厲,不可以出街玩,惟有不停做運動放電。「細個鍾意打乒乓波、游水同踩單車,到中學時就學埋打排球,大個啲仲開始跑步同行山。」現時因時常要出鏡,為了以最fit狀態示人,除了運動,她飲食方面都好健康,「朝早食用滾水沖嘅麥皮同芝士,下午同夜晚會多菜少肉,而澱粉質就完全唔食得,我係嗰啲食碗飯都會肥嘅人。」夏天她對自己會更harsh,因為好多工作都要作性感打扮,又要與張可頤、吳鎮宇拍網劇《香港華爾街》。劇中她飾演一個明星,與內地演員江奇霖會有很多對手戲。

努力在家練戲

  雖然她有主持Viu TV節目《晚吹-捲上你的牀》和《胸X計》,但未來都是以演戲為主。去年更曾到倫敦、修讀兩個月演藝課程。現時她會在家中練習:「我買咗兩部相機,錄低自己演戲時係點樣再改善。」而擁有八級綱琴造詣的Anita,嚟緊仲要為自己主演的電影《花語他/她》用鋼琴彈主題曲,她笑言:「原本佢哋想我唱埋,但我唔太熱衷唱歌要考慮吓。」

採訪:李佩儀

hd