出情歌EP唱過往經歷 Twins保證唔會爭仔反目

        組合Twins成軍16年,成員蔡卓妍(阿Sa)及鍾欣潼(阿嬌)由拍檔變成好姊妹,下月中兩人將合體推出《花約》EP。仍屬單身的兩人自爆有人追應該唔會楔灶罅,問到會唔會好似傳聞中Super Girls成員為爭仔而反目?阿Sa即耍手擰頭保證唔會:「我有潔癖,唔會接手好朋友嘅嘢,諗起都覺得好污糟呀!」阿嬌就話大家口味唔同,唔會爭。兩人仲幻想到時孖公仔行婚禮,不論時間、金錢都會慳好多。

        新EP主打情歌,當中《有約》及《失約》MV分上下集來拍,男主角慘被車撞死,阿嬌無奈控訴:「我唔明點解次次男主角都被車撞死,之前同羅力威拍微電影《星星的眼淚》又係咁,我都唔想個結果係咁,一切由導演決定。」問到兩人演繹情歌時可有勾起過往的傷痛經歷?兩人異口同聲話唔會,阿Sa認真說:「有啲嘢過去咗就成為歷史,唔使刻意去諗,做戲又好唱歌又好,呢啲感覺自自然然會走出嚟,因為經已融入感情。其中《失約》係講timing,我相信自己會搵到另一半,唔會孤獨一生。我有司機、有事業、有財富,可以照顧到自己唔使『收兵』。」阿嬌附和說:「咁我都冇唔開心,我好樂觀,唯一係讀書時期交往嘅男朋友年前被發現伏屍住所,死咗一段時間先被發現,咁年輕就離開真係有啲心痛。」阿嬌o依家好享受人生,做自己有興趣嘅事,就算單身都不怕寂寞,不過,最搞笑老闆楊受成經常同佢講:「唔好成日亂咁媾仔!」

同前度有聯絡

  至於兩人同前度係咪再見亦是朋友呢?阿嬌直言睇分手性質:「其實我唔記仇,所以有啲都keep住聯絡,有出嚟飲下嘢,唯獨有個人就……哈!佢幾勁呀!」阿Sa即開解說:「算啦!不過我除咗同初戀男友keep番聯絡,其他都冇交往,除非我結咗婚啦,(再做人夫的鄭中基呢?)唔會啦,因為我都未結婚,尤tmm其呢行都幾敏感,有時會有口難言。」

採訪:方騫平

化妝:Circle Cheung & Yannes lee@ndnco.co

髮型:Keith Wong、KateShek@Hair Culture

服裝:Ellery from 10thshop

場地:帝樂文娜公館

hd