Advertisement

見記者舉V字手勢 何超雲Shopping心情好靚

        賭王何鴻燊三房千金何超雲,自13年與陳山聰分手後,雖然4年來未有新戀情,但她好Enjoy單身生活。早前獨自行銅鑼灣,行到悶就入寵物店睇吓嘢,都好自得其樂。隔咗幾日想買衫,她又搵咗媽媽三太陳婉珍的助手Sandy陪伴畀意見。即使期間發現記者都表現得好輕鬆,更向鏡頭舉起V字手勢,心情勁靚。

採訪:梁志明

        Dry爆4年的超雲,早前曾有肥仔好友Kevin陪行街Shopping解悶。呢幾年雖未見有親密伴侶,但28歲的她一於專注事業,努力幫媽媽打理生意,連三太都忍唔住稱讚她勤力又有上進心。除咗返工,超雲平日鍾意留在家中打機、下廚和陪三隻愛貓玩耍。她為了Keep住fit爆身形,更不時會去做運動,絕不會偷懶。

享受單身

  早前她在銅鑼灣行完街,經過總統戲院附近的「寵物城」,便入內兜咗個圈,一時撩店內貓貓玩,一時與店員閒談,逗留了約20分鐘便坐Benz座駕離開。隔咗幾日,她與媽媽助手Sandy在希慎廣場現身,原來有做開運動的她要買運動衫褲。兩人入了Lululemon Athletica選購,只見二人不時商議買邊件好。揀得好興奮的她,其後發現有記者時,不但沒有影響購物心情,更向鏡頭舉起V字手勢。買完後,她搭住Sandy膊頭笑笑口離開,更開心跟記者打招呼,好Happy!

hd