生完大咗一個碼 杜德偉老婆幸福肥出巡

        55歲嘅杜德偉(Alex),去年10月榮升父親,老來得子嘅佢並無要仔唔要乸,仲同老婆講愛的宣言,話會更愛錫太太喎!日前下午,老公要搵奶粉錢,Alex太太李曉冰Ice就獨自去銅鑼灣睇BB嘢,見杜太生完大咗成個碼,下盤雄厚,她為9個月大嘅愛子Alex Junior揀學行車和網牀,講明要三年抱兩嘅Ice唔使修身啦!

        杜德偉同老婆李曉冰嘅愛情結晶品Alex Junior(AJ)去年10月出世。早前,新手爸爸大談湊仔經,佢表示囝囝每朝六、七點起身,若半夜有動靜時,太太Ice就即刻起牀照顧,所以好感激太太嘅辛勞,又慶幸囝囝已戒夜奶,自己亦會盡力幫手換片、餵奶及掃風等,有時會哄囝囝睡覺,他苦笑話︰「難度最高係囝囝扭眼瞓時,十足隻馬騮咁獸性大發係咁踢牀,唯有出動奶嘴或抱着他。」

  日前下午,Alex要工作,其滿分愛妻Ice就獨自行利園睇BB嘢。見杜太上圍谷奶,似仲餵緊人奶。AJ九個月大係時候學行,媽咪先去利園2期睇學行車,揀中一部車就放落地check吓點樣裝拆,睇吓有咩功能,然後就影張相,send畀老公問意見。其後,杜太又揀中一個網牀,方便B囝喺入面 安全咁玩。逗留廿分鐘,心大心細唔知買唔買,Ice就先行離開。臨離開時,她再行過去希慎廣場買cake,再返家湊B。

採訪:張詠森

hd