Advertisement

新歌賀《爆腎》7周年 Kevin仔:做人唔計較最開心!

        爆腎主腦李健宏(KB)成日話要用最認真嘅方法去做最無聊嘅事,其新歌《我最喜愛的YouTube節目》MV便夾埋成班老友玩轉西貢,KB自編自演「被尋仇」橋段,在街頭邊走邊唱,道出人生真理,「首歌係為《玩爆你個腎》7周年而寫,想藉呢個機會提提大家,做人唔好太計較得失,好多嘢係計算唔到嘅,比如《爆腎》一開始就本住好玩先做,我哋拍節目只係想無聊地送啲娛樂畀大家,無諗過可衍生出咁多範疇工作,過去4年真係學到好多嘢,好幸運我到今日仍能忠於自己,唔會話一roll機就變成另一個人,做人要夠真先好玩。」

        本住冇包袱可以玩盡啲心態,KB跟爆腎團隊製作的網上整蠱節目《玩爆你個腎》唔止贏盡hit rate,仲贏得後生一族追捧,個個追住follow KB新動作,新歌MV已累計有近18萬點擊,「MV籌備咗幾星期,因導演想玩一shoot拍攝,鏡頭走位超乎想像,連曾國祥都話好難搞,好在搵到個好勁嘅攝影師Quinton,可以幫我邊走邊拍,效果好正,亦搵咗好多朋友客串,黃德斌扮黑幫大佬真係好有氣勢,亦請到好好戲嘅舞台劇演員艾非助陣,成件事辛苦但好玩。」

自虐式娛賓

  由鼓佬轉型做歌手,KB慶幸自己非走偶像路線,可以選擇唱自己喜歡的歌,「其實每個人都有權選擇自己『最喜愛』的音樂和節目,《爆腎》一開始都只係好玩先做,沒太多計算,都估唔到今日得到咁多人支持。」因為玩得夠癲又無定向,KB被ViuTV召纜做真PK主持,早前更孖住火火飛到巴西做旅遊節目,12集《真PK trip》玩到癲,「跟住火火學到好多執生技巧,呢個trip吃盡苦頭,錫鱷魚、攬蟒蛇不特止,又要被蟻咬,執蟲食,主要係延續真PK精神,最慘係有次以為自己贏咗幾個巴西妹上房玩,點知原來係人妖,仲要俾人迫揸胸兼錫錫。」

撰文:彭保迦 服裝:the baddieshair :Bux@la mo d場地:the stadium

hd