Advertisement

佛山瞓身o氹歌迷 劉浩龍冧爆4歲妹妹仔

        多得Paco力撐,劉浩龍終於可回歸樂壇出唱片,重本打造的專輯《CHANGE YOUR LIFE》獲高度評價,難得可重拾歌手身份,師兄亦落力跑宣傳,早前赴佛山會歌迷的他在台上賣力獻唱,又同歌迷玩估歌仔遊戲,見現場有粉絲抱埋4歲囡囡捧場,師兄即扮雞仔聲打招呼冧小妹妹,笑到見牙唔見眼,「我本身好鍾意小朋友,好識同佢哋玩,包包(Eason囡囡)、梁浸浸(Yumiko囡囡)都好黐我,(有冇計劃做老竇?)哈哈!玩人哋嘅就好,自己未有咁打算!」

        劉浩龍轉攻影壇後,片約不斷,剛完成與Eason合作的《巨星卧底》即入組拍邱禮濤新片,啱啱喺馬來西亞拍完外景便入錄音室錄新歌,忙甩轆,「忙就好,自己都唔怕辛苦,今年計劃出兩首新歌,風格跟以往好唔同,我當自己係新人,完全由監製舒文話事。」師兄坦言已錄歌曲感覺大不同,希望給大家新鮮感,至於說好的年底演唱會,師兄歎氣說:「場地夾唔到,可能要改在明年中先舉行,再者,我都唔想只唱舊歌,就當畀多啲時間造多幾首音樂。」

湊細路有一手

  說回這次簽唱會,師兄坦言內地粉絲很支持他,「有粉絲即場掃廿隻碟,排咗三轉隊影相攞簽名,亦有一個跟咗我17年嘅粉絲,抱埋個女嚟見我,好感動,個妹妹仔好可愛,一見我就笑。」師兄自言識同小朋友溝通,而且每次都會出盡法寶陪玩,「我大我妹11年,嗰陣一放學就湊佢,梁浸浸好黐我㗎,成日嗌我『兄兄』,我唔主張買禮物o氹小朋友,反而會花心思煮嘢食同陪佢哋玩。(有冇計劃生小朋友?)哈哈!玩人哋嘅就話啫,自己未諗呀,不過我鍾意生女多啲,女識冧爸爸嘛,我諗我會用盡力保護同愛錫佢。」

撰文:彭保迦

hd