Advertisement

出攝影集帶出正能量 任達華唔准靚囡囡出寫真

        擁有藝術天份的任達華趁住香港回歸20年,今年書展將會推出第3本攝影集《香港。別的風景》,華哥出錢出力租用直升機、坐電車、纜車、甚至用航拍,用獨特角度拍攝香港建築物、島嶼、海岸線、花草、地道食物城市生活風貌等,帶出「春天仍在」正能量,喚醒大家關心身邊人和事,發揮香港人互助互愛精神。問到華哥可會為12歲愛女任晴佳操刀影寫真集?他即耍手擰頭說:「佢唔鍾意影相,我想偷拍佢都好難呀。」更堅持唔畀囡囡入行。

        華哥揚言今次出書唔係為賺錢,只收些少版稅,不過絕無hea做,他說:「我足足花咗7個月時間去籌備,因為我係土生土長香港人,又成日周圍拍外景,對香港景物實在太熟悉啦,所以做到『快槍手』,只係斷斷續續用咗20日時間影相,不經修改,亦冇咁多時間玩弄攝影技巧,由1萬張相揀150張呈現2017年香港真實一面。」他仲自爆租借老友王敏德揸嘅直升機,冇聽老婆叮囑要求打開機門俯身從高空拍照,事後向琦琦「自首」遭埋怨;另外為求影到大雨中嘅電車感覺,他在8號風球下由廣州飛奔返港攞相機去拍攝,華哥喺灣仔長大,細時窮到要徒步返學,平日坐電車成為主要交通工具,電車、電車路都係童年回憶。至於纜車就記載住同愛妻琦琦拍拖上山頂撐枱腳的浪漫小故事。

有女萬事足

  書中華仔會表達對圖片的感受,好讓大家了解他的內心世界,這一part將交由出版社代筆。華仔指囡囡好似佢咁有正能量,又指囡囡好乖、好單純及黐身,暫時好深閨唔識拍拖係乜。他笑說:「我成個手機都係個女嘅相,有佢我好滿足,眼見家庭教育嘅重要性,近年我好似食嘢咁清淡番啲,多拍年輕人電影,唔再咁重口味,費事個女唔睇得。」

採訪:方騫平 場地:尖沙咀隆堡柏寧頓酒店

hd