Advertisement

Sexy mama白Tee湊仔 激凸黃婉君惡鬥惡鬥

          做咗人母嘅娛圈索媽有唔少,好似同係兩子之母嘅孫佳君和黃婉君(Rosanne),前者年過四字頭,肌膚雪咁白;Rosanne則的骰得嚟玲瓏浮凸。日前傍晚,黑超孫佳君罕有帶埋9歲孻仔在中環ifc行孖咇,低胸tee加短褲嘅索媽露出雪白長腿睇鞋,阿仔就在附近周圍行,freestyle湊仔。另一日,打扮靚靚嘅Rosanne帶囝行超市,反斗小王子嬉戲好得意,都唔及穿上貼身白tee嘅激凸索媽咁搶鏡,恨死唔少星媽呢!

        仲有兩個月就43歲嘅前「星女郎」孫佳君,當年憑34C索爆身材殺入娛圈,早年息影同富商男友劉貴喬誕下兩名現年13歲和9歲嘅兒子,自13年同富商甩拖後,曾戀上法國米芝蓮大廚Olivier,惜分手收場,再度重新「上市」嘅佢就復出夜蒲。早前孫佳君遠赴泰國拍電影《無雙》,近日叉夠電返港即盡責湊仔。日前傍晚6時許,索媽戴黑超又戴帽湊細仔行ifc。密冚靚樣,惜招牌厚唇好易認,加上V領白tee隱約透出交叉帶黑bra,幾咁吸睛。「雪腿」靚媽在連卡佛揀鞋,細仔就在身邊叉腰扭計要轉場。星媽懶得理,繼續睇鞋玩手機;阿仔就四圍行。最後,兩母子去Apple Store問幾句嘢,就上七人車走人。

專揀有機食材

  另一邊廂,38歲嘅前組合2R成員黃婉君亦靚靚湊仔行銅鑼灣時代廣場,一對寶貝仔(6歲大仔白迅Dylan和4歲孻仔白晨Daniel)一人一袋玩具,唔使爭。之後三母子入city'super買餸,靚媽咪白tee短褲配CHANEL手袋,微笑揀嘢個樣幾迷人。而小兄弟好似樣,著上同款唔款色嘅衫跟實媽咪買餸。細佬坐喺購物車,哥哥就企喺前面一齊玩。哥哥仲會細心幫弟弟綁鞋帶,感情超好,媽咪就好放心,專心揀金車厘子、有機納豆、有機雜錦穀物早餐等等,食得有營。逗留二十分鐘,三母子畀錢走人,靚媽咪等(車立)取車時,蹲低溫柔教囝,場面好溫馨。

採訪 ︰ 張詠森、梁志明

hd