日日返學校巡視 黃婉曼生完BB開麵包店

        前天氣女郎黃婉曼(Icy),兩年前因家人愛吃麵包,便到日本修讀法國藍帶廚藝課程。學成歸來,決意開舖,將健康有益的麵包發揚光大,更邀請在當地教了8年的老師Stephane Reinat來港助陣,卻發現香港做麵包的師傅很少,所以她決定先開設麵包學校「RISE」培訓人才,同時亦接受市民或餐廳預訂麵包。她坦言第一批學生已畢業,嚟緊又招生了,目標是開實體店,讓巿民買到新鮮出爐的麵包。現時她每日都會返學校巡視,由於下月便要生BB,她表示生完BB坐完月便會立即開工,為開麵包店做準備。

撰文:李佩儀 攝影:李維隆

        原來Icy愛食麵包的程度,曾有綽號叫「麵包超人」,她笑言:「因為我鍾意飲咖啡同紅酒,所以我嘅早餐係咖啡加麵包,晚餐係紅酒加麵包;我做記者時,買袋最簡單嘅麵包由朝食到晚,我覺得係一種享受。」但香港人覺得麵包好平,係趕時間求其買嚟充飢,食正餐時送嘅,所以她好希望改變麵包的地位,她續說:「好嘅麵包唔使落芝士或火腿,我哋係食佢嘅麥香味。」

上網訂麵包

  為了做出最健康的麵包,他們的麵粉由法國入口,又會用自己培植的天然酵母,絕冇加添加劑,加上Stephane好用心去做,Icy表示曾三次去日本邀請Stephane過檔,並大讚他:「佢做嘅麵包款式多,有啲香港未必有,而且佢工藝好,喺法國都有幾間麵包舖,我係請到佢先落實開麵包舖。」只是搵地舖時舖租貴、請人又難,才決定先開班授徒,其實現時大家可上網訂麵包,Icy亦有為餐廳度身訂做麵包,生意都不俗,不過回本就較難,單是做麵包的器材成本都好高。儘管這條路非常漫長,但她凡事親力親為,即使現時懷孕,每日仍會返學校巡視,她表示生完BB坐完月便會著手籌備開麵包店。

hd