寫真集最後一擊 林雅詩拍寫真玩自虐

        林雅詩（Grace）15年突然復出，並自資推出玩Cosplay的寫真集。其後被爆有「小三」和「家暴」等不愉快事要自力更生養家，種種經歷令她有出書的念頭，適逢有書商提出不如配合寫真相一齊出，便有這本《迷失十年實況寫真》。她表示寫真主題Sell人妻Feel，有她抹地、洗浴缸和煮飯等多個造型，至於文字她花了個多月親自撰寫，講離婚女性遇到唔開心事點樣企番起身。她稱今次是最後一本，以後要Close File不會再出。撰文：李佩儀

        Grace為拍寫真集而租用了港島區一間獨立屋拍攝一星期，事前她為了以最Fit狀態影相，除了曬燈令膚色均勻，影相前一個星期仲淨飲湯水減掉8磅，並押到最後一刻先影，她解釋：「因為我之前返大陸做嘢，酒店被鋪唔乾淨搞到皮膚敏感有紅點，好彩影相時已經好番，但拍攝時我又要黐好多膠紙打底，影完後啲皮膚都係紅晒。」最搞笑是因為寫真圍繞唔開心經歷，全程都要好Cool，但有時劇組人員又跟她開玩笑，令她要再投入有點困難。

兒子支持拍寫真

　　寫真中Grace騷胸露背，除了性感，意識上都大膽，她形容：「有𠝹手、成地玻璃碎好似講自殺咁。」雖然寫真講述不愉快事，但Grace表示如果11歲兒子要睇，她都冇乜所謂，因兒子今次都好支持她做自己喜歡做的事。問Grace現時感情狀況？她表示：「仍然係單身，希望以工作為先。」問她會給經理人兼緋聞男友馬天樂一個機會嗎？她坦言：「又唔好咁講，但佢對我真係好好，教我好多嘢，又畀咗好多機會我。」她表示兒子都覺得對方Nice，因學緊空手道的他有時會請馬師傅一齊切磋。