出自傳講人生 陳美齡寫書寫到又喊又笑

        陳美齡(Agnes Chan)在去年書展推出《50個教育法,我把三個兒子送入了史丹福》,今年4月再出版《40個教育提案:把快樂帶回給香港學生》,而她首部自傳《人生的38個啟示》即將在書展中面世,亦是她第一次出書分享自己人生經歷,從而幫助年輕人面對困境。陳美齡更勉勵應屆DSE考生不要以考試成績去評估自己:「考試唔係人生全部,好多人嘅潛力係考唔到出嚟㗎。」 採訪:方騫平

        陳美齡被出版社總編輯成功游說寫自傳後開始感受到困難重重,因為62歲嘅人生經歷太多,加上中文程度唔夠好,撰寫第一本中文書是挑戰(以往是翻譯作品),她笑說:「我叫出版社幫我加上花巧字句修飾,但佢哋堅持話唔使,不過以往我出書宗旨係寫一本適合普羅大眾睇嘅書,咁我呢啲中學程度嘅語文就啱啱好。」

有排無得退休

  她形容寫書期間,心情如同坐感情過山車,回憶令她又喊又笑,有時又自言自語。其中寫到小六班主任是她「女神」,考升中試前老師篤她額頭講一句:「你好可愛喎!」激發她發憤讀書,結果由讀D班成績屬下游的學生考夠分數原校直升,呢個故事連佢老公都唔知道,同時,亦會提及當年在反對聲音下堅決下嫁金子力嘅原因。

  之前傳她獲任為教育局長惹來風波,但卻未有在自傳中提及,她解釋:「唔算係大風波,不過又帶咗好多新機會畀我。以前60歲就要退休,但o依家有咁多使命我諗唔可以退休住。」

  她自爆目前有兩個小project可行,其中一個構思搞0至18歲,每年選10本中、英文有益圖書,在網上平台推廣年輕人教育閱讀,給父母做參考指標;另一個針對0至3歲受托人提供12堂免費教育班,教導育兒適當營養及教育,令小朋友唔會輸在起跑線,讀完仲會有文憑。

hd