又翻撻5年情兩度分手 41歲陳嘉容搣唔甩印籍機師

        下月就42歲嘅名模陳嘉容Eunis,近年不斷增值自己為未來事業鋪路。愛情路上,高妹自去年初與印籍機師S先生正式斬纜後,感情真空。日前晚上,Dry爆Eunis終於有愛情滋潤,原來高妹又秘密同前度S先生兩度翻撻。話晒5年情,欲斷難斷,Eunis與S先生曾兩度分手,如今又復合甜蜜蜜食燒肉撐枱腳仲一齊返閨,揀嚟揀去,似乎最愛都係呢位大隻印籍機師囉! 採訪 ︰ 李權威、李維隆

        陳嘉容05與拍拖8年嘅名髮型師郭子輝(Ricky)秘婚,兩年後Ricky被控藏毒,二人離婚收場。失婚5年,Eunis與印籍機師S先生打得火熱,不時被記者拍到二人當街親熱及互餵,甜蜜爆燈!惜異國戀離離合合,Eunis重返盛女行列。月前,高妹靚女出席活動時透露與朋友投資百萬搞資護膚品及時裝生意,更話因太忙無時間拍拖,查實暗地裏與前度S先生再續情緣,希望盡快「脫盛」嘅Eunis怕見光死,唯有密冚戀情!

服侍女友

  日前傍晚,愛在男友面前以真面目素顏示人嘅Eunis先獨去中環擺花街一時裝店搵女友人吹水,打躉十分鐘至約7時,Eunis就急步行去附近嘅士丹利街商廈搭(車立)上樓,原來印籍機師男友早已在日本餐廳開位,等女友嚟歎燒和牛做晚餐。見兩人並肩同坐卡位,男方不停燒;女人繞埋雙手等食!翻撻無耐嘅戀人一邊食一邊傾,全無冷場,更一杯汽水兩份飲,鬼咁甜蜜。甜歎個半鐘,慣早睡早起嘅Eunis嗌走人,兩人就落樓去買生果。見Eunis揀了一梳蕉,畀錢時唔小心整跌碎銀,拎住長遮嘅S先生即欲衝前執,但溫柔女友快人一步執番,然後男友伸手截車,有紳士風度幫女友開車門,雙雙坐車返歸二人世界!


hd