「游生」彈起 狂吸金 袁文傑貼地過平民生活

        運氣嘅嘢話嚟就嚟!好似45歲嘅凍齡袁文傑,加盟無線不出一年已憑高收視劇《不懂撒嬌的女人》中嘅霸氣游生一角彈起,青靚白淨嘅佢自稱大叔,即被封「大叔男神」。商演、廣告及新戲接踵而來,應該好快夠錢買樓娶老婆啦。日前下午,本報在中環巧遇呢位身高6呎3吋嘅長腿Oppa,鬧市遊走嘅佢全程無遮無掩,以真面目自信示人。見型佬逼港鐵、買貓糧及去碟舖,上位男神生活照舊好貼地O架! 採訪 ︰ 張詠森

        「男長人」袁文傑90年參加無線藝訓班入行,但當年礙於身高問題被大台嫌棄。其後,佢做過模特兒、拍過電影,做過亞視人。早幾年,他在YouTube節目《傑出阿仙奴》做足球旁述,其講波霸氣作風,被無線監製關樹明睇中;去年中,佢同無線簽一年約,並出演首部4K劇集《不懂撒嬌》飾演大老闆游生一角而彈出,仲拍咗兩部重頭劇《天命》及《深宮計》,形象正氣又超入屋,難怪大台想簽佢做親生仔啦!

急餵愛貓

  本周三(26日),人氣「游生」跟應屆12位候選港姐飛去台北拍外景。日前下午,好高大嘅袁文傑穿上西裝褸孭皮背囊man爆現身中環。見佢上了擺花街一商廈,逗留兩小時就落樓,徑自快步行去中環站搭港鐵。沿途多人認出長腿oppa,但高佬都係一副自信有型步伐,做過model係唔同啲。入閘後,高佬熟路往柴灣線車頭方向行,行埋一邊怕「太突出」啩,然後玩手機低頭等車。入到車廂,佢仲差啲頂車頂!屈膝幾個站,話咁快到咗炮台山,佢摩打腳行出地面往寵物雜貨店買了7、8罐貓糧。再走入一個舊式商場,打開背包拎出幾隻DVD還碟,今時今日仲有租睇影碟習慣,撐正版又慳家。最後打的返家,唔通趕住餵心愛嘅異國短毛「囝囝」食嘢?!

名草有主

  人氣急升嘅袁文傑已有位拍拖6年嘅港姐女友張潔蓮Jackeline。40歲嘅Jackeline早年做過兒童節目主持,05年離開無線後,便做回老本行幼稚園教師。

hd