55歲牛一300萬開蓬Benz跑贈自己 梁朝偉揸新玩具買餸

          上月尾55歲牛一嘅影帝梁朝偉,生日時與愛妻劉嘉玲恩愛合體慶生,鬼咁開心!原來電眼型男仲秘密豪花近300萬,買咗架新款開蓬Benz跑畀自己。日前下午,「凍齡教主」梁朝偉照舊好casual穿上運動look、戴帽戴口罩密冚靚仔樣,揸「新玩具」去金鐘太古廣場超市買餸。見近年來嚴控三餐防三高嘅佢專揀有機食品,食得有營健康,Keep住凍齡! 採訪 : 李維隆

        神級美魔男梁朝偉和51歲嘅太太劉嘉玲,由拍拖到結婚近30年,婚姻生活崇尚freestyle,成功箍掂另一半。早前,電眼型男完成馬楚成執導嘅新片《歐洲攻略》後,終於可以回港唞,不過撞啱靚老婆要飛去英國見證侄仔大學畢業,順便度假,偉仔唯有做住家男,外出買餸整輕盈餐單。

乜都有機

  日前下午3時,一身運動服、戴cap帽口罩嘅偉仔獨自低調去金鐘太古廣場超市買餸。見佢將口罩拉近雙眼、加上頂帽壓得好低,幾乎遮晒個靚仔樣。近年注重養生嘅偉仔,除愛跑步、滑雪和滑水等帶氧體能運動外,亦有搵營養師度身訂造營養餐單,嚴格控制三餐防三高,更會定期到醫館針灸調理體質,實行內外防腐保凍齡。所以當日見「隱者」喺超市專揀有機蔬果,好似有機沙律菜、有機藍梅等,就算揀樽沙律醬,都細心閱讀成份標籤,盡量食得少糖少鹽少油。

  逗留二十分鐘,美魔男買了幾樣食材,埋單五百多元,碌卡找數。之後,佢落車場取車,行近部「新玩具」、S500深藍色開蓬Benz跑。將袋餸放入車尾箱後,又望吓部新車,明顯好like。之後佢就上車即「解除裝備」,露出童顏真面目。此時,偉仔發現有記者,表情愕然帶點傻氣,超級可愛,然後開車返回山頂和福道大屋。

hd