Advertisement

中女唔怕Dry 戴辛尉 有母陪食陪買

        已故歌唱名師戴思聰有兩個乖女,一個係45歲已做咗嫲嫲嘅「凍齡魔女」戴蘊慧;另一個係95年同謝霆鋒拍過拖、o依家大約中女四十嘅阿妹戴辛尉。日前晚上,單身嘅辛尉戴副小雲眼鏡做孝順女,陪母親去銅鑼灣行街食壽司。兩母女沿途有講有笑勁好傾,感情似足兩姊妹。

        講開戴辛尉,一定要提吓佢胞姊戴蘊慧(真真),皆因3年前,已係兩子之母嘅真真做咗嫲嫲,阿仔和女友誕下B女。嚟緊10月,駐顏有術嘅真真48歲,着比堅尼一啲都唔失禮!加上佢投資有道,早前斥資4,500萬元喺英國曼城狂掃8個豪宅單位,失婚都唔愁生活。

  咁阿妹辛尉呢?當年15歲嘅霆鋒拜師其父學唱歌,19歲嘅辛尉近水樓台,同對方譜姐弟戀。近年,教唱歌又做歌手嘅佢自稱無男友但好多人追喎!

  日前晚上7時許,化晒妝嘅辛尉戴副小雲眼鏡,同媽咪現身時代廣場。見辛尉一路食緊支電子煙,一邊與母親吹水,表情十足,鬼咁好傾。「叉完電」,兩母女在附近快手買咗袋韓國品牌嘅護膚和化妝品。之後轉場行時代廣場地庫,又係睇化妝品,睇吓眼線筆、唇膏等等,買完放埋入手袋,就去千両食壽司。食飽飽,臨走時買多袋麵包,就排隊打的走人。

採訪 ︰ 梁志明

hd