新戲撞車致失憶 李思欣拍跳樓戲驚差錯腳

        李思欣最近與吳啟華和朱慧敏合作在深圳拍內地新戲《奪命追兇》,雖然好多演員都是第一次合作,但因大部份都是TVB出身,所以有默契拍得又快。由於戲中講她遇車禍失憶,之後要接受催眠恢復記憶搵真兇,發揮都幾大。最難忘是車禍那場,因她跑出馬路後、架車撞埋嚟要較啱Timing;另一場講她唔開心上天台疑似跳樓,「喺二十幾層樓高嘅天台行嚟行去,望番落去都幾驚。」

        故事講李思欣在車禍中失憶,但因她是車禍的唯一目擊證人,所以飾演心理醫生的吳啟華,要透過催眠幫她恢復記憶搵出真兇。她笑言:「我仲以為催眠要用吊墜放喺眼前Fing嚟Fing去,原來而家唔使,望住電腦好迷幻嘅圖像已經可以。」她除了與吳啟華多對手戲,朱慧敏會飾演她的家姐,黃竣峰就做她的男朋友,還有李雨陽和杜大偉等。她稱因大部份演員都做過TVB,只需事前對吓稿,埋位一、兩Take就搞掂,拍得都幾暢順。

天台行嚟行去好驚

  其中一場講她在天台徘徊疑似跳樓,她坦言:「嗰場都幾驚,因為都二十幾層樓高,雖然佢哋有用木板、紙皮同鐵罐墊地下,但企上去好高、好有離心力,仲要行嚟行去,好怕差錯腳。」另一場撞車戲都有危險性,她解釋:「因為我要跑出街,架車撞埋嚟要啱啱好煞停,所以事前都要試好多次。」由於她要拍一星期,老公范振鋒都有去探班,她笑言:「大陸有個App係送外賣,佢嚟到即叫,等我拍完一齊食。」

撰文:李佩儀

hd