努力儲錢買樓 蔣家旻買件衫諗過度過

        TVB藝人蔣家旻(Angel)因《愛.回家》中「馬子妮」乖乖女一角深入民心,早前在劇集《踩過界》飾演啤酒妹,被有錢仔禁錮虐打,演技有突破令人眼前一亮。入行逾10年的她,最近積極學習理財投資之道,Set咗套「儲蓄絕技」,目標是在35歲前置業,仲有8年時間,難怪早前她到銅鑼灣樓上舖睇衫都諗過度過,雖然一件只係幾百蚊,但她都忍手唔買咁多,一件夠晒數。

        蔣家旻自嘲入行初期勁鍾意買嘢,經常將收入使晒;近年收入增加略有積蓄,但都唔算多。至幾個月前,有圈內朋友以自身經驗與她分享理財心得,解釋人生必須有計劃,先儲蓄才有本錢買樓,即使首期不足亦可以作其他投資,這番話令她有動力去學習理財。而她的「儲蓄絕技」是預先設定每月儲蓄金額,再以花費去「就」;若開支太多,會將朋友約會延期,或忍手等下月才購物,故現時每月儲蓄都有「大躍進」。

  既然Set好目標,Angel也講得出做得到。早前她到銅鑼灣富明街樓上舖Amelie Street睇衫,見她看得好雀躍。睇咗一陣,已揀中一條牛仔裙,跟住她入試身室,試完後似乎好滿意。之後她繼續在店內選購,一時又問吓Sales意見。

  但揀咗大半個鐘,最後都只係買一件落樓,睇嚟為咗儲錢,她都好忍得手。一買完衫,她又忙於回覆Message,然後再徒步到禮頓道某髮型屋整頭,但應該有得Sponsor,又慳番啲。

採訪:梁志明

hd