Advertisement

搞慈善跑步 吳日言險同老公反面

        33歲的吳日言(Yan)今年作出新嘗試,成立了非牟利團體「一言合作社」並首次聯同慈善機構合作,於9月17日在科學園舉行《Lifewire Run愛跑‧香港地》,收益撥捐幫助病童。初次搞慈善活動,她坦言滿足感大於一切,但就同統籌成員之一的老公Barry常為公事嗌大交。問到可會影響造人大計呢?阿Yan即大笑自爆唔會:「好彩佢第二朝主動叫番『老婆』O氹番我,咁造人又唔一定要晚上啫。」

        今次活動主題是環繞舊式香港,正好勾起當日自己作為屋邨妹,在邨內狂跑放電的兒時生活,所以當日找來一些七、八十年代舊式樂園及士多來擺攤位,同時由她執導,拍膊頭找來好友周國賢、麥子樂、梁嘉琪及湯怡等拍宣傳片,故事講述4個屋邨長大的年輕人背負重擔後遺忘了快樂。

  吳日言承認以前工作一度失去方向,曾經有諗過放棄轉行,但又怕浪費累積10多年的人脈關係,把心一橫不如用諸社會,既有津貼又有嘢學,更加可以幫到有需要的人,最想幫到一些環保團體,目前團隊只得4人,期望愈做愈好,可以向政府申請資助,她說:「今次經驗好難忘,尤其是第一次敲門問人攞錢贊助,呢個年頭搵人攞錢好似打劫咁,有啲朋友講好畀錢嗰刻玩失蹤走數,唔知日後好唔好再聯絡,追錢又會好尷尬。最忟係老公好順得人,同我積極爭取嘅作風好唔一樣,兩公婆磨擦好大,甚至嘈到話呢世唔再合作,相嗌唔好口,好傷感情。嗰排搞到我情緒起伏好大,諗深一層,咪當係對大家一個考驗,試吓磨合。」

採訪:方騫平   場地:美樂雜貨店士多

hd