難忘三兄弟齊食雪糕 何廣沛:諗起都想嘔

        去年拍住方中信和廖啟智演《律政強人》被讚的何廣沛,最近在《超時空男臣》演靚仔公公「小冬」,一樣好受女觀眾歡迎。廣沛認為靠累積失敗經驗外,多得有兩個戲裏戲外都視他如細佬般照顧的好兄弟曹永廉和蕭正楠,不過好兄弟還好兄弟,提到三個大男人一齊食雪糕一幕,廣沛大呻:「真係諗起都幾想嘔㗎!」

        向來都話演技是需要浸淫,廣沛在《樓奴》負責搞笑,但他認為這次是完全失敗,「嗰時以為浮誇就會好笑,但反而係反效果,《樓奴》真係好失敗,自己睇番都明白點解觀眾唔接受。」不過有了失敗經驗,廣沛在《超時》學精了,「其實故事設定我哋古代人嚟現代生活,已經會好搞笑,所以反而唔需要誇張,踏實去做仲好笑,都有人問過我,點解演公公唔做多啲乸啲嘅手勢,但劇情要我哋掩飾身份嘛!同埋公公真係唔一定要好乸,佢好細心咁照顧兩個大哥,其實已經有種乸乸哋嘅感覺。」

導演有心整蠱

  談到跟蕭正楠和曹永廉默契十足的表現,廣沛坦承全靠兩位兄弟真心相對,「我同阿廉合作過一次,同阿蕭第一次合作,我本身比較慢熱,好在我哋去咗佛山拍外景,對足成個月,佢哋好照顧我,好快我就融入到。」不過好兄弟還好兄弟,講到要一齊食一杯雪糕,差點脷疊脷一幕,廣沛即大呻,「嗰場戲我哋要顧住雪糕溶,又要忍住笑,其實我哋忍笑忍到對腳喺枱底不停震O架!最慘係導演好似專登玩我哋咁,成日唔肯嗌Cut,搞到我哋真係差啲脷掂到脷,講真,諗起都幾想嘔㗎!」

採訪:杜淑霞

hd