Advertisement

南非拍節目畀槍指嚇 黃奕晨老竇夏雨唔擔心

        「夏雨囝囝」黃奕晨(Dixon)早前為港台節目《城巿遊棄II》,到了非洲、南非、比利時和台灣等地,一些被遺棄角度拍攝,行程有一定危險性,他和攝製隊在南非一度被槍指嚇,最後雖得悉是警察,但一樣驚餐死,不過老竇夏雨以及剛公開戀情的Super Girls成員Cheronna(吳嘉熙)女友,竟同樣不擔心喎!

        在ViuTV主持過不少節目的Dixon,知道今次以紀錄片形式拍攝,還要去一些已荒廢的地方住,有晒心理準備一定好辛苦,但想不到世界另一啲角落,仍有人過着這種生活,「好似南非咁,約翰內斯堡巿中心以往明明好繁榮,但o依家竟然變成罪惡溫牀,嗰日我哋落車去個廢墟度拍嘢,當地聯絡人已叫我哋小心,佢幫我哋睇住架車,無耐就聽到佢叫,原來有人想搶車啲嘢,後尾有架車駛過,有人跳落車捉住嗰兩個賊仔,但又用支長槍指住我哋喎!當時真係好驚㗎!但聯絡人同佢哋傾咗,話佢哋係警察嚟,但佢哋冇着制服,仲要架車就嚟爛咁,但聯絡人咁講都唯有信,等自己安心啲囉!」

不抗拒同女友合作

  不過Dixon坦言爸爸夏雨和女友Cheronna拍攝前沒有擔心他的安全,「我出發前同老竇講,佢都叫我唔使擔心,電視台拍嘢好安全,至於女朋友拍攝前我哋都未喺埋一齊。」談到入行一段日子,外界仍將Dixon跟夏雨拉在一起,他一點都不介意,「咁我始終係佢個仔嚟,況且咁樣真係令到大家容易啲認識我,但將來都希望有日大家叫夏雨做『黃奕晨個老竇』。」談到跟女友Cheronna合作,Dixon不抗拒,「希望我知名度高番啲先,o依家同佢出街通常fans都係叫佢合照多啲。」

採訪:杜淑霞

hd