Advertisement

火葬場殯儀禮堂拍劇 飛虎型男歎住冷氣玩自評

        邵氏網劇《飛虎極戰》由型男張兆輝、苖僑偉(三哥)、黃宗澤(Bosco)及吳卓羲(Ron)演出,當中Bosco經常突圍「出招」,喺網上大晒六塊腹肌,又分享反串女人Look嘅絕密造型,成功搶咗唔少風頭。不過,講到真正型男,眾人不約而同首推三哥,操到一身fit爆腹肌嘅輝哥好謙虛咁指住三哥話:「佢叫型偉嘛,乜你唔識咩?」

        日前,四個型男到鑽石山火葬場內拍攝一場送別「陳山聰」戲份,因為喺殯儀禮堂取景,在酷熱天氣下四人都可以歎陣冷氣消暑,輝哥說:「因為拍外景熱到大汗疊細汗,啲汗黐住戲服連換衫都有問題,要用布抹好耐先搞得掂。之前拍淋雨戲又曬過,搞到初起感冒要馬上睇醫生,兼且用毛巾捲住個身吸汗瞓一晚。」Bosco自爆穿起焗身嘅飛虎衫,又不斷做動作摩擦,有啲位焗到生熱痱同汗疹,好辛苦。當問到可要看皮膚醫生時?他大笑說:「咁又唔使,又唔係生皮膚癌,痕起上嚟咪搲吓佢,我有好好保護靈魂之窗,開槍時會帶眼鏡。」

眾人讚好三哥

  輝哥自言不夠年輕人威猛,所以劇中唔使晒肌,眼中最fit係三哥,點知三哥話最型係吳卓羲,因為他頭髮最長,係典型時下小鮮肉形象,而Bosco肌肉最多,兩人未到老臘肉,最少都係午餐肉啦!仲話睇住兩人大,睇住兩人變做古惑仔。卓羲笑住說:「我呢啲係假髮,而且人魚線已改做鯨魚線喇。」Bosco自封係滷肉;輝哥形容係免治牛肉,既有味又新鮮,三哥笑指自己係chok肉。

採訪:方騫平

hd