Advertisement

鄭嘉穎撲返港做司機 陳凱琳買Tea慰勞男友

        47歲鄭嘉穎同26歲陳凱琳Grace嘅父女戀,外界一直唔睇好,但二人愈拍愈甜,仲有機爆冷結婚O添!日前下午,忙北上搵人仔嘅嘉穎唔使開工,即返港陪女,揸車去銅鑼灣接小女友收工。Grace見honey咁識做,即買晒咖啡、三文治等慰勞男友,返對方愛巢開餐。

        相戀兩年半嘅鄭嘉穎和陳凱琳愈愛愈高調,試過selfie上網晒恩愛、做埋孖公仔行情侶檔有錢齊齊搵。女神Grace早前行婚紗騷,仲開晒口恨嫁,自爆想兩年內出嫁,又話生兩個B,鬼咁冧daddy級男友。

  近日嘉穎終於做完《風雲》內地巡演,佢就把握時間撲返港見吓小女友。日前下午5時許,女神Grace同疑似女助手和女友人一行三人現身銅鑼灣百德新街。見Grace頭戴cap帽化咗妝,助手又幫佢拎住幾袋嘢,似係啱啱收工,準備走人。忙咗成個下晝,未食飯嘅Grace即去買咖啡、三文治等醫肚,仲買夠二人份量,預埋honey嗰份。戴晒情侶帽嘅嘉穎亦收call即到,揸住架萬事得紅色MX-5開篷辣跑接女收工。小女友笑笑口上車,一見男友就冧笑,癡戀到暈!然後驅車幾分鐘,火速返男方大坑寓所二人世界。

採訪︰梁志明

hd