Advertisement

一家四口陪Shopping 毛舜筠繞實索大女好滿足

        早前,毛舜筠飛到加拿大參加21歲長女區令山嘅畢業禮,大女清純有氣質靚樣被網友大讚。近日,大細女齊返香港,難得一家團聚,區氏一家去銅鑼灣Shopping享天倫,阿媽主力買,阿女同老公就全程陪住,57歲仲好靚嘅Mo姐好幸福。

        Mo姐去年四月曾為大台拍處境劇《八時入席》,但劇集超「短命」, 十個月就玩完,一向對工作有要求嘅Mo姐無發揮之餘仲被指多事,甚至俾人針對,主角變配角。Mo姐冇癮心死拒再添食,其實唔拍劇Mo姐唔會死,仲慳番好多時間去讀藍帶,又可以四圍去旅行,都唔知幾爽。

Mo姐入唔到貨

  日前傍晚7點,Mo姐一家去咗銅鑼灣希慎行街,四人先到adidas睇運動衫褲,見Mo姐拎起啲運動衫係咁睇,然後就去試身室試衫,試完衫再試埋褲,全程兩個囡囡都有畀意見,逗留半小時兩手空空離開。四人再去買雪糕同咖啡,然後再去睇鞋,無錯,都係Mo姐要買鞋,兩個女行咗一陣就坐喺度等媽媽,又係逗留半個鐘,乜都睇唔啱就走。大女繞實阿媽落電梯,細女就同爸爸殿後,一家四口齋行都好開心。

採訪︰李權威

hd