歐遊前 好慳家 楊秀惠唔怕逼睇減價貨

        上月33歲牛一嘅無線小花楊秀惠,幾年前進軍美容王國,除香港和星馬有分店,嚟緊仲會殺入澳門,愈做愈大。雖然營業額高達八位數字,但日前飛咗去歐遊嘅女強人原來係慳妹一名。日前下午,見佢獨自去中環皇后大道中嘅Zara睇減價衫,黑超秀惠唔介意同人逼摷衫,不過一見記者就快閃走人。

        長腿小花楊秀惠3年半前進軍美容界,香港、星馬都有分店,每年營業額過千萬,9月更會在澳門再開分店,不過女強人話唔會離開娛圈,仍好眷戀拍劇生活。早排,秀惠拍住張衛健、蔡思貝等拍攝大台劇《大帥哥》,趁出發去內地外景前有十幾日假期,即把握時機與家人飛歐洲慶祝7月20日生日,玩轉瑞士、奧地利和德國三地,「充電」勁開心!

  日前,秀惠出發歐遊前先獨自去中環shopping。當日,佢黑超淡妝喺Zara睇衫。大部份女裝衫減至$79至$199,小花就好專心揀吓短裙短褲,啱晒佢大晒長腿嘛!之後佢睇中一條直間花花闊身長褲,攞上身埋鏡睇吓,都唔錯喎!就拎住再睇其他衫,行逛多陣,佢眼利發現記者,衫都唔買,火速走人,去對面車場取車離開。

採訪 ︰ 張詠森

hd