啜出人氣 一家三口幸福出巡跛腳安志杰禁「警鐘妻」埋身

  打星安志杰日前喺內地拍新片時不慎右腳受傷,要急返港做手術兼休息成個月。養傷其間賺咗時間陪妻兒,仲帶傷孖火辣未婚妻Jessica C.(JC)做Gym。豈料,二人自拍錫錫晒恩愛片時,男方情到濃時手多多,掂到「老婆」個34C「警鐘胸」,即被網友瘋傳狂洗版,人氣飆升!日前下午,呢對熱情準夫婦帶歲半B女和外傭去中環ifc超市大手掃貨。右腳打咗石膏嘅安志杰撐住枴杖喺商場一馬當先快行,唔通怕老婆喺身邊,又忍唔住當眾出手?!

        40歲嘅安志杰(Andy),靠一身爆肌真功夫打出個未來,上月中喺寧波拍攝劉鎮偉執導嘅《功夫聯盟》時受傷,右腳筋腱斷裂,要坐住輪椅急返港做手術,需打石膏6星期,最快本月中再赴象山續拍半身文戲。加上十月一早plan好同混血索模未婚妻JC去夏威夷舉行婚禮,所以Andy好心急想盡快好番,養傷其間都keep住做運動。點知日前佢孖住背心仔JC齊齊做gym,疑錯手發佈一條「香艷片」,本想拍一條攬啜恩愛片放ig,但錫錫吓男方隻手曳曳,一手摸落「警鐘」度,嘩!好hot!就算火速刪片,都有網友第一時間開心share。

零妝JC 密實湊女

  日前下午5時許,人氣男女帶歲半B女Tessa及外傭現身ifc嘅city'super。見佢哋買咗成車餸、飲品及日常用品等,就畀錢走人。Andy雖然右腳打咗石膏又撐住枴杖,但大隻佬行得鬼咁快,一出超市就拋離妻女。綁上頭帶嘅Andy,一身運動look加背囊好鬼型。見黑超JC無化妝,穿上連身短裙加薄外套及涼鞋,孭住愛女殿後。當大隻佬發現有記者,嘴角微微向上一笑,然後繼續「三隻腳」大步大步行,率領眾人行過四季酒店,搭的士返家。

採訪 : 李權威

hd