舞台劇演美少年 陳國邦爆囡囡當卡通人物

        陳國邦最近忙於為「香港話劇團」慶祝成立40周年的舞台劇《紅梅再世》演出,阿邦坦承一直很欣賞該劇團製作,等了30年終有機會再合作,他二話不說答應演出,而首次演繹美少年「裴舜卿」,阿邦笑言自己外型Keep得好,演起有一定說服力,反而因古裝造型對比較大,囡囡陳禛竟當他是卡通人物,相當搞鬼!

阿邦仍是演藝學院學生時,已參與過「香港話劇團」演出,往後雖未有機會合作,但不時欣賞劇團演出,「佢哋製作係信心保證,但係咁多年都冇機會再合作,難得隔咗成30年,今次佢哋邀請我,我咩都無諗就答應咗啦!」

自誇生得後生

  今次《紅梅再世》是改篇自著名粵劇作家唐滌生的經典作品《再世紅梅記》,不過阿邦未有刻意看該粵劇參考,「始終係改篇,加上粵劇同舞台劇有一定分別,我都係跟劇本演繹為主。」至於要演美少年,阿邦也不擔心欠缺說服力,「呢樣嘢應該係藝術總監搵我時擔心,哈哈!其實舞台同觀眾有一定距離,而且舞台造型對比大好多,加上我本身外型都唔係太似實際年紀(49歲),反而係肢體動作上要注意多啲。」談到獲得不少老友撐場,阿邦很感激他們支持,「我每次有演出佢哋都好支持,好似(黃)浩然忙開劇都仲度緊期嚟睇。」至於太太羅敏莊和愛女陳禛更不時到後台探班,「阿囡唔使返學都有嚟,嗰日仲攞住個花牌嘅名牌當扇幫我撥涼,真係好Sweet㗎!不過佢好少咁近距離見到我呢個造型,佢覺得好得意,應該當我係卡通人物嚟。」

採訪:杜淑霞

hd