Keep住戀愛mode 任達華拖完攬攬老婆

        62歲嘅美魔型男任達華,早排拍完戲,即飛去歐洲會合妻女,開心度暑假。日前下午,華哥忙裡偷閒陪名模老婆琦琦行逛中環ifc。「高人夫婦」睇衫時有商有量。離開時,華哥夫婦更變番「孖條」,溫馨拖完手,萬人迷丈夫更忽然與高模妻貼頭攬攬,結婚18年嘅模範夫妻拍拖去等車,恩愛到暈!

        早已「登六」嘅凍齡人夫任達華,近日已埋位拍葉念琛執導嘅英皇賀歲電影《我的情敵女婿》,同靚靚人妻劉嘉玲做對手戲。忙工作吸金,華哥亦好重視家庭樂,早前陪12歲乖女任晴佳(Ella)到歐洲放暑假。

愈行愈煙靱

  日前下午2時許,乖女開咗學,華哥就拖愛妻行ifc。見「高人夫婦」喺意大利品牌Mr & Mrs ITALY睇衫。黑超琦琦主攻女裝;丈夫就貼身幫眼睇衫。其間,華哥睇中一張毛氈,出手摸吓又問老婆意見。逗留十分鐘,無收穫就拖手離開。此時,華哥眼利發現記者,一手拖妻一手做出V字勝利手勢,有靚老婆喺身邊,笑得勁甜!然後兩夫婦行去四季酒店等車接載,二人愈行愈煙靱,美魔男攬住老婆條腰都未夠,仲忽然頭貼頭,時刻Keep住戀愛mode,恩愛放閃!咁啱迎面而來有對年輕男女又係攬腰做連體嬰,同華哥夫婦好似照鏡咁款囉!

採訪 : 張詠森

hd