出HiFi碟兼籌備開個唱 54歲露雲娜踢走10磅脂肪

        自7年前與陳奕迅合唱《講男講女》獲好評後,退出樂壇20多年的露雲娜(Rowena)愈唱愈有癮,繼14年夫妻檔推出過HiFi碟《Perry Martin Audiophile CD Featuring》,最近再出《酒紅色的心》,演繹日本殿堂組合安全地帶的日曲粵詞作品。54歲的Rowena重燃唱歌一團火,更成功搣走10磅贅肉為明年開個唱做好準備,搵到第二春同埋人生目標,Sharp醒晒嘅Rowena開心大笑說:「失婚唔開心咗幾十年,o依家我好幸福,做乜都覺得好好笑,真係好快樂。」

露雲娜唔再收埋自己,相反更活躍樂壇宣傳最近推出嘅HiFi碟《酒紅色的心》,因為收錄嘅全部都係改編安全地帶嘅作品,包括《夏日之神話》、《月半彎》及《拒絕再玩》,玉置浩二更是其超級偶像,其中一首慘情日文歌《Yubikiri》,Rowena錄音時真係唱到想喊,問到邊首歌係大愛時,她諗咗好耐都揀唔到:「因為隻隻都係我bb,我比較鍾意《酒紅色的心》嘅結他聲,歌曲旋律又正,感情方面都好投入,每日唔可以唱多過3個take,否則會冇晒mood。咁我唔怕大家將我呢個版本同原唱者及阿倫比較嘅,因為男女唱法唔同,編曲又有分別,所以我冇壓力,但我會畀校長聽吓再叫佢畀意見。」

o依家好開心

  她坦承演繹慘情日文歌《Yubikiri》時有勾起昔日落寞畫面,但事隔咁耐都唔會牽動到情緒:「以前嘅事都忘記晒,做人要向前看,就係因為以前好唔開心,先會對比到我o依家有幾開心,我好感恩,好珍惜,我現任老公咁好係個天賜畀我嘅,佢同fans都好錫我,仲有拉返我出嚟嘅大哥哥賈思樂同埋囝囝Brian,有佢哋我先捱得過。」

採訪:方騫平

         髮型:Chris Cheng & Ben Poon @IL COLPO Platinum

化妝:Jennifer Chan @Annie Chan.G Make-up Centre 場地:IL COLPO Platinum

hd