捱餓7日拍寫真 32D樂瞳日灌1.5公升奶 谷大兩CUP

  31歲樂瞳(Cilla)自今年6月離開工作10年的TVB後,第一個Job就是推出「See la Cilla」處女寫真集。兩個月前她到檳城1星期、每天影10個鐘,共拍了27個造型,當中最吸睛的是比堅尼水着Look,32D身材呼之欲出,她自爆近年日日灌1.5公升全脂奶令上圍連升兩Cup。而為了影寫真更Fit,拍攝時她全程靠飲流質飲品和食奇亞籽糖沖水頂肚。因為出來的效果滿意,捱餓也是值得的。

首次出寫真,樂瞳決定去到盡,除了出動多套性感泳衣和喱士內衣,露肩、露腰兼騷腿乜都有,還有她最鍾意的「真胸上陣」家居服Look。樂媽媽曾問她:「係咪一定要咁性感?」她稱當年播完《點解阿Sir係阿Sir》後,已經想出寫真,無奈TVB和唱片公司為顧及她形象而婉拒了。六年後的今日,她回復自由身,「趁年紀唔係咁大,狀態仲OK,影嚟留個紀念都好,今次出完我未必會再影。」而作為一個女藝人,她有唱片、有劇集,現在有埋自己的寫真集,真是大滿足!

搽豐胸膏Firm啲

  由於她話自己係肥底,飲啖水都會肥,出發前又因去咗美國LA玩,食咗好多好嘢,返港唔夠一星期又要去檳城,所以惟有邊影相邊進行地獄式減肥,「我帶咗啲嘢飲去沖,朝早會沖紅豆水或減肥咖啡嚟飲,晏晝肚餓就沖麥片飲,或者食粒奇亞籽糖再飲水,因為佢喺肚裏面會發大可以頂吓肚,之後就唔食嘢喇。」每日影完相,當團隊喺度大魚大肉,佢就匿入房做拉筋和伸展運動。捱餓7日,雖然未有上磅睇吓瘦咗幾多,但明顯身形線條出番晒嚟,難得上圍又冇乜縮水,「因為我會搽Firming同豐胸膏等佢挺啲、唔好鬆弛。」

想開工作室搵錢

  她自爆去年聽朋友講飲全脂奶可以豐胸,所以每日當水飲灌1.5公升,「飲咗奶之後唔單止上圍大咗,係成個人都肥咗。」她愈飲愈鍾意,無奈早前因要拍美容院廣告,日前又開拍新戲,明天就要出席寫真集的簽名會,為咗上鏡靚啲,她戒完奶又戒紅酒,仲要節食,「而家以多菜少肉為主,而每日六點後就唔食嘢,加埋做瑜伽同去美容院做機Keep Fit。」她強調:「今次出寫真係有特別意義,我唔係諗住走性感路線。」而且她覺得當日決定向外闖是對的,「其實離開TVB都擔心收入唔穩定,但呢三個月已經搵番我過去一年嘅收入,所以我有諗過開自己嘅工作室,一腳踢做自己想做嘅工作。」

撰文:李佩儀

hd