拍戲變身麻辣老師 孫耀威求逼真唔計較傷患

        孫耀威(Eric)仲有條件做「學生王子」,不過,於冼國林執導的青春校園電影《我們的6E班》中,Eric就「升呢」成為一間以南亞裔生為主的「國際學校」班主任,帶住影壇新貴葉芷如(Lemon)聯手教好一班「麻煩」學生。戲裏戲外Eric都導師上身,拍追打戲時更意外地弄至左手手指爆骨。Eric唔計較:「最緊要可以帶出有教無類,社會平融訊息,做演員預咗周身傷患,年紀大咗要承受後遺症!」

        電影中作為麻辣教師的Eric跟問題學生出生入死,一起被追打。重提該場被打戲,Eric說:「面對一班冇演出經驗嘅真學生,冼國林動作要求又高,混戰間我被硬物擊中左手手指虎口位置,傷口腫到冇咗凹位,睇醫生做檢查才知手指爆骨,傷勢唔輕,嚇到老婆陳美詩爆喊,o依家太大動作觸及傷患仲有少少痛,不過我康復能力好高,唔使擔心,受傷翌日我咪一樣開工照打,邊度夠當年拍台灣劇集《懷玉公主》外景時墮馬咁大劑吖,受傷一刻即時昏迷被送院搶救,足足有半年唱唔到歌呀,o依家經常要啪返正胸骨,手尾好長,冇辦法喎,做演員一上身就會全情投入唔理得咁多,所以我都冇要求受傷賠償。」

  問到作為陳嘉恒師妹,打得吓的葉芷如當時點解唔保護Eric?

  Lemon笑笑口說:「只有佢照顧我,呢啲係新人嘅福利!」她又自爆Eric 阿sir「上身」,「學生哥」自然喚他做阿Sir,叫她做Miss:「佢哋幾怕Eric,所以見到我哋成日拍住上對我都好客氣,唔敢口花花,最多話『點解個Miss咁靚,阿Sir咁型!』」

採訪:方騫平 服裝:tuxee.co 髮型:Sunny Yu@ Hair Culture 化妝:江中平化妝室 場地:美麗華酒店

hd