泰國直擊 黐高鼻 整「孖腸嘴」 甄子丹親解「跛豪」真面目

        劉德華與甄子丹兩位影壇大哥,首度拍檔拍攝逾兩億元人民幣巨製新片《追龍》月底上映。戲中飾演大毒梟「跛豪」嘅宇宙最強甄子丹,為演活經典人物,不惜苦練潮州話,更提議搵特技化妝師日日花兩小時「黐鼻隆嘴」,務求令聲線動靜兼外形都可重現靈魂角色。早前,本報貼身跟隨甄子丹赴泰國拍外景,更直擊丹爺嘅「變臉」過程。化咗特技妝嘅丹爺親自剖白「跛豪」真面目,仲搞笑說:「黐咗兩條臘腸嘴,好彩無親熱戲咋!」

由甄子丹、劉德華孭飛嘅新片《追龍》,講述了上世紀六七十年代香港兩大著名狠角色大毒梟跛豪(甄子丹飾)和五億探長雷洛(劉德華飾)的傳奇故事。重拍當年經典不容有失,丹爺為演活潮州怒漢「跛豪」,落足心機苦練潮州話三個月。早前身在泰國拍外景嘅丹爺與潮州幫「手足」食飯時,以歪音潮州語互chat,十級爆笑。「跛豪」上身嘅丹爺豪氣話:「你唔知呀!你畀面就叫我豪哥,唔畀面就叫跛豪。你唔好呃我,一呃我就打X你。」又指枱上逾二十碟餸款式好少,笑說「呢粒魚蛋,今日巴X閉。」飯局笑聲不絕。

玩盡潮州話

        笑談一輪潮州話,丹爺回復一本正經謂:「為呢部戲,學潮州話都學咗3個月,好難學。然後讀吓啲歷史,睇吓呢類戲種嘅片。因為好多人對我演葉問嘅印象太深,所以演呢部我更加要好大突破。而真人(跛豪)唔肥,所以我唔使增肥,咁樣有驚喜啲。但我好欣賞呂哥(呂良偉)當年刻意槽肥去演。」然後親自拆解其面上嘅特技化妝,他說:「其實鼻和嘴係假O架!我參考過真人嘅五官,凸顯番鼻同嘴,多啲潮州人特徵。每次上妝要兩小時,黐咗兩條臘腸嘴,仲有個鼻,一層層黐高,無去韓國O架!」再睇番丹爺同劇組推薦、重金搵曾同佢合作《大鬧天宮》時嘅特技化妝師幫佢「變臉」嘅兩小時過程,層層黐貼,幾可亂真。

採訪 : 彭子僖

hd