曾為舊愛卑躬屈膝 Super Girls新歌唱出心聲

        5人女子組合Super Girls(SG)最近推出新歌《女僕》,新歌由黃偉文填詞,歌詞係講好多女仔愛「收兵」,亦有唔少女人為另一半甘願做女僕。隊長趙慧珊(Aka)自爆過去幾乎每段戀情都係「姐弟戀」,但年齡上限只係細3年,她坦承唔介意對象有冇錢,就算「軟飯王」都ok:「如果真心鍾意,我又有錢養佢有乜所謂?女人蠢起嚟就係咁㗎啦。」吳嘉熙(Cheronna)即取笑她:「咁可能有好多窮人都會鍾意你喎!我好窮會第一個鍾意你先。」

自從傳出成員陳穎欣(Yanny)和李靜儀(Heidi)因為爭仔鬧不和後,最近組合出席公開活動多數5缺1,當日SG接受本報訪問時Yanny亦因病缺席,Cheronna即代解畫,表示Yanny緊張工作,搞到晚晚唔願瞓身子虛弱;Aka希望她乖乖戒除打機惡習重投正常生活;Jessica見Yanny狀況帶點擔心加忟憎,直言想鬧爆她,因為宣傳期齊人才夠完整;Heidi則反應平淡說:「佢參與唔到我哋可以幫手支持住嘅。」

  講番新歌,4人異口同聲相信係唱出唔少女仔嘅心聲,她們亦做過「女僕」好有共鳴,而且要傷到一個點才會死心抽身而出。Aka自爆情陷一個男仔好幾年,不停變本加厲為對方付出,直到死心時寫下不快經歷提醒自己不要重複犯錯。問到係咪吳業坤時?她即面紅紅尷尬耍太極說:「唔記得咯。」問到坤哥係咪好Hurt女仔,Aka答得有情有義,「其實佢對個個都好。」最後更強調同坤哥一直係朋友。

人人有慘痛經歷

  至於Cheronna憶述前段不健康的戀情時更激動得眼有淚光:「因為要討好對方,就算歪理都係啱,我甚至狂摑自己塊面,打到瘀晒求對方原諒,當時成個人陷入崩潰狀態,完全受到支配冇咗自己,好恐怖。」同夏雨兒子黃奕晨拍拖嘅Cheronna坦言o依家先知咩叫做甜蜜。Heidi試過三更半夜喺男仔樓下等咗幾粒鐘送上驚喜,換來冷淡反應,原來對方經已有女友;蔡明思(Jessica)讀書時放假唔返香港陪父母,反而由美國飛去瑞士幫男仔做「阿四」,對方卻全程黑她面,好淒涼。 採訪、方騫平

hd