「夫妻檔」主持節目 范振鋒李思欣拒分享閨房樂

前新城台長朱明銳(銳哥)最近加盟全新網台「面包台」(BreadRadio)出任CEO,更拉埋昔日舊愛將范振鋒夫婦撐場。銳哥笑說:「佢兩公婆好畀面,佢哋係第一次夫婦檔合作做主持,節目《思家范局》話題圍繞家庭,仲會爆埋閨房樂趣添!」此語一出兩公婆即合拍地耍手擰頭!阿范仲順水推舟擺老友林盛斌上枱說:「關於房事問題可以訪問阿Bob,尤其係佢工作咁頻密攰爆依然可以生到仔,勁呀!」

日前銳哥率新舊主持人介紹「面包台」新節目,除銳哥的一班昔日班底外,還有黄建東、前跳唱女子組合HunterZ成員陶枳樽等。阿范大賣口乖,指銳哥「吹雞」諗都唔使諗點都要做!o氹得銳哥鬼咁開心,忍唔住「醒」阿范:「o依家內地流行送嘢比網紅,你哋第日收到大把禮物呀!」阿范話諗落都開心,他笑說:「咁我可以諗吓啲錢點使,我諗可以置業嘞。」

  然而,兩公婆做嘢好有要求,做直播前會先度好話題,做到言之有物:「我哋會用過來人身份分享吓無傷感情嘅鬧交事件,同埋一個家庭常遇到嘅問題,但閨房事就唔打算開心share嘞,我哋未係七老八十,都唔及銳哥咁多經驗啦,呢方面留畀佢發揮。」問到兩公婆合體工作可會多添拗撬?李思欣話唔怕:「反而仲多咗共同話題,可能我哋會留畀對方有適當空間,而且好識得互相遷就。」

兩公婆多咗話題

  至於陶枳樽簽咗大名娛樂後封胸「從良」,致力向主持及唱歌方面發展,而她主持的節目《咬住面包去旅行》會周圍窮遊,帶觀眾體驗生活;黄建東剛好相反,他跟林超榮食好西,笑言腹肌已變由六變一。

採訪、方騫平

hd