做打雜幫太太梁潔華搞粵劇社 黃日華澄清無唔妥阿囡男友

  早前TVB晚上重播經典劇《天地豪情》,黃日華演出癡情「甘樹生」仍令人津津樂道,現實中華哥亦出名是愛妻號,自從88年跟梁潔華婚後一直恩愛,並育有女兒芷晴。13年底梁潔華患上急性血癌,當時華哥不但經常陪伴愛妻左右,更為太太搬家方便靜養。華哥見梁潔華休養年多後,已回復狀態,早前更支持太太實現多年心願,兼慶祝兩人明年結婚30年,成立粵劇社「雙蓮華」。上周六(9日)劇社舉行首次演出《紅樓夢》,潔華姐還粉墨登場演「薛寶釵」一角,華哥則滿場飛幫手,他笑言:「我咩都唔識,只係個超級打雜!」而提到被指不滿囡囡芷晴男友Jimmy,華哥澄清絕無此事。

        當晚華哥和囡囡芷晴一早到場幫手打點,令本來好緊張的潔華姐都定好多。提到早前有指華哥不滿愛女芷晴的男朋友Jimmy Fung,華哥澄清絕無此事,「梗係無啲咁嘅事,作得就作!女大女世界,我不嬲都唔管佢啲嘢,只要佢鍾意同開心就得啦!好似佢當日入行,我都係支持佢,只係提醒要承受得到呢行啲是是非非囉!」

親自幫手黐閃石

  雖然潔華姐已迷上粵劇10多年,但華哥笑言未有受影響,「我真係唔多識㗎!老婆平時喺屋企睇戲同聽歌,我都會陪佢嘅,仲有佢有演出,我盡量都會去支持佢。」

  華哥謂為償太太的心願,早前決定自己搞個粵劇社,順便作為結婚30年的禮物,「做長劇一直係佢嘅心願,所以想自己搞個劇社。(你負責做出納?)我話我畀錢㗎!但係佢話唔使,所以其他濕碎嘢咪我畀囉!同埋佢叫我幫手做咩咪幫囉!我咩都唔識,所以只係個超級打雜嚟!」不過,慶功時潔華姐卻爆料,原來多年來演出的戲服,華哥都有幫手黐閃石,連今次女主角的戲服亦有幫手,「平日佢會幫我啲戲服黐石,芷晴就串吓珠仔,今次仲用咗3日時間幫女主角梁燕飛套戲服黐閃石,因為布料係絲質嚟,所以特別難黐㗎!」

為夫妻健康戒煙

  潔華姐又透露,明天她跟華哥結婚30年,應會再有演出作慶祝,問到華哥可會考慮粉墨登場,他笑言:「只要唔使唱,扮家丁我都無所謂㗎!」潔華姐聽後,「呢個提議都幾好喎!下次可以考慮吓,哈哈!」

  華哥一直支持潔華姐演出粵劇,原來也因覺得太太愈演身體愈好,「唱粵曲要識用丹田運氣先唱到,可能因為咁佢好似練咗內功咁,身體嘅氣運行得好咗,個人都愈嚟愈精神。為咗佢健康同我自己健康,我仲戒咗煙5個月,雖然暫時只係用電子煙代替,但目標係完全戒晒佢,不過戒咗之後食咩都覺得特別好味,依家變得好為食,都肥咗啲㗎!」睇完「甘樹生」令觀眾更掛住華哥演出,華哥笑言:「其實我真係唔係太鍾意拍劇㗎!只係當一份工作。(咁你最鍾意咩?)梗係踢波啦!」難怪華哥戒煙後,身形無暴脹,依然咁Fit啦!

採訪:杜淑霞


hd