挑戰古天樂做打仔 林家棟 雨中肉搏 爆肌日星

  今年憑《樹大招風》首奪金像影帝的林家棟,早前刻意蓄鬚操fit,為的是要應付近日開拍的懸疑追兇片《智齒》,片中他「從良」做警察,更有連場動作戲,似想挑戰好友古天樂早前在《殺破狼.貪狼》首度挑戰動作戲獲一致好評,爭做新一代打星?!日前晚上,家棟在觀塘一舊樓天台拍一場暴風雨下肉搏戲,對手是日籍大隻佬池內博之。見二人濕身隻揪,搏晒命似打MMA咁勁O架!採訪 ︰ 李權威

        50歲嘅林家棟,演技超班不時接受新挑戰。繼早前以泰語在《貪狼》演出大反派,近日家棟挑戰動作片,與李安兒子李淳合作拍攝鄭保瑞執導的新戲《智齒》。為備戰角色,家棟4月開始健身兼節食,戒食澱粉質只吃早餐,到月前開拍瘦了8磅。家棟苦笑指月前開拍時,鄭導要他在屎渠前翻垃圾尋找贓物,結果弄損手,又試過「跑到『扯蝦』,跑咗一世人嘅quota」。

濕身捱重拳

  日前晚上,全身黑色打扮的家棟和飾演露宿者的日籍大隻佬池內博之在天台搭建的露宿者之家standby。本身係柔道黑帶的池內博之滿面鬍鬚,滄桑look,他拉筋做熱身後ready隻揪。現場營造出暴風雨效果,兩男濕身肉搏,打得幾吃力,見家棟不時硬食拳頭,被對方㩒住打,更打到瞓地。但家棟仍寧死不屈,單手撐開對方又箍頸鎖腳,結果反客為主,起身重擊O架佬!一停機,二人渾身濕透喘晒氣,家棟摸住「0出血右手」好痛苦,似乎弄假成真,堅整傷。休息一陣,家棟爭取時間主動和對手認真研究動作戲。然後拍多兩次,導演滿意收貨,家棟即走出場景唞唞,話晒啱啱激烈打鬥完,回吓氣先再拍啦!

hd