港姐典範 丈夫孭24磅萌巨B 葉翠翠 滲幸福師奶味

        早排,23歲出爐港姐冠軍雷莊𠒇外貌備受批評,網友狂踩佢棚哨牙,惹來全城激烈爭議。查實過去45屆港姐,都孕育出好多美麗典範。好似05年冠軍葉翠翠,今年4月為丈夫周曉東生咗個7磅半「小王子」周津羲(Jak),新手媽淡出幕前專心happy湊仔,極速瘦身嘅佢回復產前靚樣,但不時化身幸福師奶陪夫shopping。日前傍晚,幸福人妻一家三口現身銅鑼灣時代廣場超市,其夫孭上24磅重餅印小王子拖妻買餸。其間,啖啖肉萌爆小巨B瞓着,薄妝人妻即馬上哄呵愛子,幫忙整理睡姿,溫馨滿瀉!

採訪 : 梁志明、李權威

        剛踏入36歲嘅新任媽咪葉翠翠,不時在網上平台分享湊B、補身同瘦身秘訣,近日逢周四晚上在big big channel開Live,堪稱阿媽界KOL。由於懷孕時營養充足,所以B囝,早前4個月大已發育至9個月身形,搞到被內地網民負評指「肥唔代表健康」,EQ高嘅靚媽霸氣回覆:「比較是妒忌的行為,不需要在意。」近日,5個半月大嘅餅印B囝重24磅,要着一歲大衫仔,肥肥白白愈來愈可愛。

激白嫩膚

  日前傍晚6時許,薄妝人妻拖丈夫帶baby去時代廣場city'super買餸。薄妝嘅翠翠雖然成面油光,但皮膚激白嫩滑,應該係日日勤用佢口中嘅「美白神器」,保養得宜。住家男孭住重磅B,一手拖車仔;一手拖實老婆,先去揀選乳酪、牛油、牛奶等,再買幾盒日式咖喱醬,然後又掃啲意粉、烏冬等。沿途Shopping,兩夫婦都不時細心照料B仔,會逗吓baby笑,又會哄埋錫錫。行行吓,愛子不敵睡魔急call,側頭甜睡。媽咪即馬上幫忙整理睡姿;父親又用手臂托頭,然後火速埋單走人。

hd