相差12歲仍合拍 方力申蘇麗珊拒做愛情奴隸

        方力申和蘇麗珊雖然相差12年,但最近在電影《愛情奴隸獸》中合演情侶一樣無違和感,兩人更互笠高帽。戲中小方演甘願做女友「奴隸獸」的小男人,他坦承本身相當有男子氣慨,要說服自己去演繹;而現實中蘇麗珊也拒絕做「奴隸獸」,更會看輕這種男人,但她自爆自己好易O氹,不會要男友跪地求。

        睇慣方力申身邊是鄧麗欣,原來換上蘇麗珊一樣合襯,蘇麗珊也覺得跟前輩合作好愉快,「佢好暖男㗎!對我呢個新丁好包容。」小方聽完即笑着話:「其實冇咩特別,只係提佢拍完呢場,未埋位住可以休息吓唔使企喺度曬啫!」

接受唔到跪地求

  今次小方演的是非一般「奴隸獸」,戲中他跪地求女友高海寧兼被狂摑,他承認這場戲確難演,「真係要說服自己㗎!嗰日仲要喺銅鑼灣鬧巿拍,實在好尷尬,同埋自己都好Man,冇可能會做啲咁死狗嘅事,就算係被捉到去偷食,最多都係講對唔住,同埋我相信自己揀嘅女仔,我跪完地都唔會睇得起我囉!」

  戲中蘇麗珊勁藐小方,現實中她坦言也會睇不起這類男仔,「雖然呢個係兩個人相處方式,一個願打一個願捱,但係去到跪地真係誇張咗囉!我都覺得鍾意一個人應該帶有少少崇拜,好似戲裏面我冧『瀟灑哥』(袁文傑飾)咁。」不過她又強調本身非野蠻女友,「我好易O氹,激嬲咗畀嘢食我就搞掂。」

撰文:杜淑霞 攝影:謝民光 化妝:Yen Lai(方力申)、Will Wong@WiLL makeup(蘇麗珊)

髮型:Vince Pang&Euling Chow@IL colpo Platinum(方力申)、Will Yu@the attic(蘇麗珊)

服裝:Mcq@I.T(方力申)、Style Nanda@ithk(蘇麗珊) 場地:Emax


hd