新劇拍足半年 楊秀惠「放監」Shopping

        33歲嘅無線長腿小花楊秀惠(Vivien),自進軍美容王國做女強人後,就少咗拍劇,不過今年都接咗部50周年台慶劇《大帥哥》,同回巢嘅好戲之人張衛健有唔少對手戲。拍足半年嘅重頭劇日前煞科,秀惠開心「放監」去咗中環ifc瘋狂Shopping。見佢買完鞋再睇衫,賺到錢唔怕fing啦!

        3年半前進軍美容界嘅秀惠,早排拍住張衛健(Dicky)、蔡思貝等拍民初劇《大帥哥》,劇中佢扮演大帥張衛健嘅二姨太艾妞。早排班演員去佛山拍攝逾40日,秀惠坦言戲服又厚又唔通風,「乾煎」12粒鐘疑中暑頭暈,要助手幫佢搽藥油。不過就對Dicky讚不絕口,讚對手於未埋位時會邀請拍檔到其座駕涼冷氣,又對台前幕後每個人都非常有禮。

靚人靚袋出巡

  新劇日前終於煞科,秀惠「放監」後即去shopping撐吓本土經濟。日前晚上7時,Vivien化咗個妝靚靚出巡,佢孭住個LV手袋現身中環ifc。見佢啱啱喺好多藝人熱捧嘅Giuseppe Zanotti行出來,無見一排,小花依舊親切有禮,主動停低同記者say hi及吹水。佢話早排忙拍劇無時間行街,o依家拍晒嘞,就出嚟買嘢鬆一鬆。報完料後,秀惠拎住袋戰利品再連行幾間boutique,買多袋衫,才揸車走人。

採訪 : 李權威

hd