女神年賺百萬 倪晨曦逼港鐵鹹蛋送飯

        月前踏入30歲嘅倪晨曦(Elva),05年憑靚樣選美入行,拍過戲又做過模特兒,最爆莫過於08年跟黃宗澤傳過吓緋聞囉!近年Elva轉戰社交平台,拍片上癮,日前仲開間「晨曦工作室」,靠拍瑜伽、美容和旅遊短片紅透網絡,年賺百萬。日前下午,被捧做網絡女神嘅Elva素顏現身中環。黑超靚女獨自逼港鐵去堅尼地城,一落車即熟路行去揀平靚正菜,加多兩隻鹹蛋,煮簡單住家菜做晚餐。

        靚樣激似應采兒mix湯洛雯嘅倪晨曦,係05年多倫多華裔小姐冠軍,翌年參加國際華裔小姐入行。撈足近十年,Elva見喺娛圈無乜起色,加上自己怕悶坐唔定又勁多嗜好,本身係瑜伽教練嘅佢喜歡運動、旅行、美容等,將興趣放大,成功轉型做KOL,短短3年IG儲落逾52萬粉絲,被網民捧為KOL教主。Elva見喺網絡咁受歡迎,且收入三級跳年賺過百萬,就食住個勢,月前喺黃竹坑開咗間千呎工作室,發大嚟搞。

二十幾蚊買餸

  日前下午5時,網絡女神Elva出席完外國的時裝周後返港,見戴上八角形墨鏡、零妝嘅Elva打算在中環置地廣場等的士,但睇見條長長人龍,即轉軚搭港鐵去堅尼地城。身高5呎7吋半嘅靚女沿途急步行,長牛仔裙下不時乍現長腿,幾吸睛。玩一陣手機,話咁快到站,佢熟路上地面行去一檔平價蔬菜店買餸。她手拎一個藍色銀包仔、手指夾住張五十蚊紙,拎咗一份粟米、兩隻鹹蛋,加一札八蚊通菜,大約都係二十幾蚊,似為是日晚餐加啲餸。畀完錢,Elva快步行返附近寓所,途中入咗間便利書揭吓雜誌,快速打書釘幾分鐘,才返家準備晚餐。

採訪 : 張詠森

hd