網友好推介 李思欣遊釜山吸文化氣息

        李思欣早前與老公范振鋒一齊到韓國釜山出席一個貴賓會的開幕活動,今次他們擔任嘉賓表演唱歌。第一次去釜山,所以特登留在當地玩多兩日。除了遊覽當地著名的旅遊景點「甘川洞文化村」睇壁畫,也有到附近行沙灘吹海風。今次他們品嚐了當地的燒肉和海鮮,之後仲卡拉OK直落好盡慶。李思欣覺得可以寓工作於娛樂,都是每次出Trip的Bonus。

        李思欣稱首爾去得多,但釜山都係第一次去,所以事前都上網搵資料睇吓有咩好去處。她覺得當地冇首爾咁多姿多采,但文藝氣息濃厚,因為得四日三夜時間唔多,一半用來工作,得一半時間玩,所以今次只去了「甘川洞文化村」,她說:「啲網友話一定要去,因為嗰度好特別,每間屋都唔同顏色,又有好多壁畫,啲壁畫全部搵藝術家設計,所以好靚,我哋都影咗好多相。」之後他們更到海雲臺的沙灘吹海風,欣賞釜山沿海一帶的風景。

海鮮好抵食

  原本李思欣也有打算去水族館,但如果參觀完就唔夠時間食飯,所以只是經過門口影了張相作「到此一遊」。最開心都是去搵食,當地出名食燒肉,他們搵了間大型的燒肉店,她稱:「由於醃料唔多,都係食肉質嘅鮮甜。」他們又去了食海鮮,平均每人約港幣$300。有晚他們偕其他朋友一齊去唱卡拉OK,她笑言:「雖然間卡拉OK有啲舊舊哋,但佢哋唱晒韓文歌又跳晒舞咁,都玩得好High。」

撰文:李佩儀

hd