市道差唔敢加價 陳展鵬自爆舊年尾食穀種

        由「視帝」陳展鵬及鮑姐(鮑起靜)主演的劇集《同盟》大結局收視高達31.8點,逾200萬觀眾收看,算係行返個尾彩。因為劇集效應,陳展鵬坦言由10月到年尾呢段「黃金檔期」接了近20個商演,當問到係咪好快儲夠老婆本跟緋聞女友單文柔結婚時,他即說:「又唔使好多錢先可以娶老婆嘅,我個價收到唔貴,真係好抵用。」

        日前陳展鵬在契姐黑妹姐(李麗霞)的安排下,為某珠寶金行周年晚宴出任特別嘉賓,身穿藍色西裝的展鵬邊唱《同盟》主題曲《一觸即發》邊行上台,沿途大受fans歡迎,不停拍照及握手,陳展鵬則笑晒口,態度親民。唱完一曲更用國語跟在座觀眾打招呼,仲歌癮大發話會唱多首羅文的《好歌獻給你》,其間行近台邊兩側照顧觀眾,睇到觀眾勁興奮。落力展鵬自爆只求抵用長做長有,他自爆成為視帝的「苦況」:「其實去年做咗視帝後食咗好耐穀種,加上市道低迷,O依家有返啲嘢做真係唔敢加價,我歌酬比市價低,攞完獎都冇升過,豬籠入水完全冇我份,而且近年先有機會搵真銀,算唔上係鑽石王老五!」

無物業有股票

  問到默默「吸水」係咪想置業築愛巢?他即耍手擰頭表示目前樓市太高唔係入市時機,但就要搵定籌碼,當機會來到時就起動,胡亂投資只會做「大閘蟹」:「當年沙士時我用160萬買入滙景花園及葵涌一個酒店式住所單位,最後滙景花園以400多萬沽售,O依家手頭冇任何物業,但持有股票,包括40多元買入嘅渣打,仲有騰訊等大藍籌,我始終覺得,股票係全球嘅『遊戲』,房地產只屬香港嘅文化,唔夠宏觀。」

採訪:方騫平

hd