南亞裔朋友遭歧視 喬寶寶為在港同鄉發聲

        47歲的喬寶寶由演員踩過界做埋水果及冰皮榴槤月餅生意,對於近年南亞裔人士在港的罪案率不斷上升,喬寶寶替同鄉發聲:「我相信香港人好明事理,唔能夠一竹篙打一船人,不過身邊朋友都曾受白眼,見到佢哋好戒備,希望可以由我哋帶頭做起,多啲宣揚『保護弱者,招呼窮人』訊息。」

        「開心果」喬寶寶日前獲邀為某金行45周年晚宴登台演出,又唱又跳大搞氣氛炒熱個場,寶寶仲好醒目咁做埋抽獎嘉賓,老闆開心到爆,對其表現勁滿意。他說:「咁觀眾鍾意睇咪盡力做囉。」佢又提到喺TVB新劇《使徒行者2》中飾演三哥苗僑偉屬下,係臥底,佔戲都幾多,「首次做卧底都幾破格,好好玩,最開心三哥日日請食飯唔使捱飯盒,除三哥外,老婆都搞大咗我個肚,變得又肥又鈍!因為我返蘇格蘭時老婆日日叫我試菜做白老鼠,食完乜都要讚吓,咁樣同個女人感情會愈嚟愈好,我哋兩公婆雖然唔係成日見,但感情都好好。」

好多同鄉為港人服務

  提到近年在港南亞裔人士罪案率不斷上升,喬寶寶坦承有關注,感到好傷心,甚至有唔少朋友被冷待,他認為港府要設法解決呢啲難民問題:「自政府放寬難民政策,多咗南亞裔人士持行街紙喺香港犯案,其實可以重開難民營安置佢哋。其實好多南亞裔人士都為香港服務,如投身警隊、做地盤、修路工人等,對社會好有貢獻,我哋個南亞裔組織成日帶頭發起做慈善,周一至五仲會喺灣仔錫克教廟免費派素食扶貧,好正面。」

採訪:方騫平

hd