懶理有「爸爸手」痛到癲 林子聰 抱仔遊老銅

        因為當年六師弟一角,香港人知道誰是林子聰,呢位個樣好Cute又好多肉嘅肥仔近年喺內地撈得好掂,有事業有老婆又有仔,做人做到咁仲想點。日前下午4點,肥仔聰一家三口加一個朋友去銅鑼灣行街買太陽眼鏡,除咗Shopping,其他時間肥仔聰都係抱住22個月大嘅囝囝,之前佢話自己抱仔已抱到有「爸爸手」,親子「毛聞」最緊要,痛就痛啦。

        做咗爸爸之後,肥仔聰眼中只有囝囝滔滔,佢話試過喺深圳拍戲,一收工就湧住趕返屋企只為「睇吓個仔」:「囝囝試過擔櫈仔坐喺門口等我,老婆就拍片畀我睇,真係好窩心,佢好獨立同懂事,試過太太唔舒服,佢就自己玩,唔會打擾媽媽,好叻仔!」

連體父子

  個仔咁乖,爸爸當然錫到燶,嗰日,肥仔聰喺渣甸街買太陽眼鏡,試完唔啱就抱住個仔走,一出門口見到記者,肥仔聰教囝囝同記者揮手Say Hello,滔滔有啲疑惑眼望望,仲望咗好耐,問肥仔聰買唔買到眼鏡?佢話買畀朋友。之後一行四人行去皇室堡停車場,沿途阿聰負責攬實個仔,就算有「爸爸手」搞到背部肌肉拉住痛都無所謂。

採訪:梁志明

hd